سيدي ريس الوزراء المحترم كلش ابو أسراء البخيت

سيدي ريس الوزراء المحترم كلش ابو أسراء البخيت

م/ شنهي أخبار الحكومة الجديدة ؟؟ سلام عليكم يابدر البدور ،سلام عليكم ياأبن الغصور ، يافخر كل العشاير والأفخاذ والصدور، يامن نذرت روحك للعراغ وماخليت بربعك فغير ومكدي وكله صارت أصحاب غصور، سيدي المناضل الأول بالعراغ : عندي اشجم سؤال أريدن أسألك بيهن بس كون ما تزعل من عمك ملا فاخر وهاي الأسئلة كلهه تجي من منطلغ الديمغراطية الجديدة اللي جنابك جبتهه وياك يوم صرت الريس مالنه، وبحظك وبختك تحجي الصدك من حيث آنه أريدن أسولف لربيعتي زيناتك لأن ياهو اللي أجيب طاريك يمه أشو عبالك أبزه أبره مال حصن شنهي السالفه ماأدري ، وكبل ماأسألك أريدن تبشرنه وين وصلت الحكومة ؟ بيكم رجه وتسون جاره لهاي الوادم التباوع عليكم لو السالفة تطول مثل ماكال السفيرالأمريكي للشهر الثامن ؟؟ لأن الذبح أبشرك رد مثل الأول والطكاكات ردت وماطايح بيهه غيرأولاد الخايبه الماعدهم ذنب ولا ماكلين ولاشاربين ، خويه أريدين أسالك على هاي الوادم المسوربه يمنه ويسره واحد رايح لأيران والآخر للسعودية ولسوريه وتركيا شنهي سالفتهم ؟ شنهي بس انتم هيج ؟ شو هاي الدول كلهه تنتخب ووره جم يوم تطلع حكومه جديده وتمشي الأمور ، بعدين هاي المحاصصه عرفناهه والشفافيه رحمة الله على ابو الجعفري دلانه بيه ، بس هاي اللوجستينيه اللي ثابرينه بيهه شنهي؟؟ شو ياهو التكظه يسولف على اللوجستينيه ، كون هذا مرض يو طاعون الله يجفينه الشر ، المهم أكو سالفه ثانيه كلش غاثتني هاي مالت المربع الأول ،جا بويه أنتم ماتكدرون تفلشوه بكريدر؟ لو من هاي الشفلات الفاخرة مالت الأمانه ،سالفتنه أنتم من تسولفون شو جنكم تستحون من بعضكم كله تحجي بالغوايم، طكهه فرد طكه وكول لعليوي مالك شي وفضهه ، جا أنت خايف منه؟ شو ماشالله عمامك هواي وآنه هم خليني عد يمناك، تره اني أتكشمر وياك أكولن هلبت يوم تدز على عمك وتنطيني تفكه فاخره يو مسدس من ذن اللي توزعهن على الوادم جا آنه بيه كمل؟؟ بس دير بالك من هذا عليوي تره أكو ناس تعرفه زين وتكول هذا جان كبل من جماعة أبو طبر وتره ضربته والكبر والأشقيائيه مالت الفضل كلهم داير ما دايره وكلهم جنهم عتاوي جايعه واحدهم لغده هامتنه، أي تره آنه كتلك وظلت يمك، بقى سؤال لاخ كلش محتار بيه ومدري صدك مدري جذب، يكولون جنابك لام نسابتك وولدك يمك بالمكتب الخاص مالتك واحد كاض المخاسيرمدري مشتريات واللاخ كاض الدرب على الرايح والجاي وأبنك مديرمكتبك الخاص جا أشخليت من صويحبنه الراح؟ شنهي ماعدكم شي مالتكم؟ كلهه تغليد ؟ المهم تره أكو ناس ماعدهم شغل غيرك وهاي آنه كتلك وظلت يمك السالفه ،والسلام عليكم ورحمة الله وبركاته